Хүрэн манжин

//Хүрэн манжин

Хүрэн манжин

 

Хүрэн манжингийн эрүүл мэндийн ач тус:

Хүрэн манжинг олон өвчнөөс урьдчилан сэргийлэх болон эмчлэхэд хэрэглэж байна.

  1. Хоногт 500 мл хүрэн манжингийн шүүс тогтмол уухад цусны холестерин, өөх тосны хэмжээг бууруулах, судсыг амраах, тэлэх, цусны урсгалыг сайжруулж улмаар цусны даралт бууруулж зүрх судасны өвчнөөс урьдчилан сэргийлнэ.
  2. Булчингийн хүчилтөрөгчийг нэмэгдүүлэх үйлчлэлтэй тул дасгал хөдөлгөөн хийхийн өмнө, агаарын бохирдол ихтэй үед болон зүрх судасны, амьсгалын эрхтний зарим өвчний улмаас хүчилтөрөгчийн дутагдалд орсон хүмүүс хүрэн манжингийн шүүс хэрэглэх нь зүйтэй.
  3. Тархины цусан хангамжийг дээшлүүлж, уураг тархийг хүчилтөрөгчөөр хангах тул ой санамжийг дээшлүүлж ахимаг настай хүмүүст тохиолддог зөнөх үйл явцыг сааруулдаг болохыг судлаачид тогтоожээ.
  4. Гадаад орчны таагүй нөлөөнөөс эд, эс, эрхтнүүдийг хамгаалах замаар аливаа үрэвсэл, архаг өвчнөөс урьдчилан сэргийлэх, дархлаа дэмжих, нойр сайжруулах зэрэг үйлчлэлтэй.
  5. Бие махбод дахь хортой бодисыг саармагжуулах, хоргүйжүүлэх, хорыг гадагшлуулах шинж чанартай тул бүдүүн шулуун гэдэсний, ходоодны, мэдрэлийн, уушигний, хөхний, түрүү булчирхайн хорт хавдрын эрсдэлийг бууруулах ач тустай.
  6. Уламжлалт анагаах ухаанд хүрэн манжинг бие махбод болон элгийг цэвэрлэж хоргүйжүүлэхэд өргөн хэрэглэж иржээ.
  7. Цусны сахарын төвшинг бууруулах, эсийн инсулин мэдрэх чадварыг дээшлүүлэх шинж чанартай болох нь тогтоогджээ.
  8. Хоол боловсруулах эрхтний гүрвэлзэх хөдөлгөөний дэмжиж өтгөн хатахаас сэргийлэх ач тустай.

Хүрэн манжингийн хэрэглээ

Хүрэн манжин нь С аминдэм, фолийн хүчил, кали, манган зэрэг аминдэм, эрдэс бодис болон ислэгээр баялаг тул бие махбодын дархлааг дэмжих, хэвийн үйл ажиллагааг хангахад ихээхэн тустай. Түүнчлэн хүрэн манжингийн навч, иш нь төмөр, цайр, фосфор, зэс зэрэг эрдэс бодисоор нэн баялаг тул хүнсэнд хэрэглэх нь зүйтэй.

Хүрэн манжингийн өнгийг бүрдүүлдэг бета-лайн хэмээх нөсөөт бодис нь антиоксидант болон үрэвслийн эсрэг үйлчлэл үзүүлдэг учир чихрийн шижин, зүрх судасны өвчний үед хэрэглэх нь үр дүнтэй болохыг судлаачид тогтоогоод байна. Хүрэн манжингийн өнгийг нь хадгалахын тулд хальстай нь хүйтэн усанд угаагаад ууранд 20-30 минут орчим жигнэх эсвэл усанд чанаж болгосны дараа хальслаад хоолонд хэрэглэнэ. Хоолны давс нь хүрэн манжингийн өнгийг хувиргадаг учир чаналтын төгсгөлд нэмэх нь тохиромжтой. Хүрэн манжинг зууш, шөлтэй хоолонд хэрэглэхээс гадна цуужуулж хэрэглэдэг. Жижиглэж хэрчсэн хүрэн манжин дээр ус нэмж буцалгаад элсэн чихэр, нимбэгийн хүчлээр амтлаад ундаа бэлтгэж болно.

Хүрэн манжингийн давуу талууд

  • Дархлаа сайжруулна
  • Бие махбодыг цэвэрлэнэ
  • Зүрх өвчлөлөөс сэргийлнэ
  • Цусны даралт, сахар тогтворжуулж, цус төлжүүлнэ
  • Булчингийн хүчил төрөгчийг нэмэгдүүлнэ
  • Хорт хавдраас сэргийлнэ

Эх сурвалж: SDC-с гаргасан “Хүнсний ногооны ач тус, хэрэглээ” гарын авлагаас.

2018-01-02T13:31:42+00:00 2018 оны 01-р сарын 02|Зөвлөгөө|

Leave A Comment